கசியும் மௌனம்: கீச்சுகள் தொகுப்பு

குளிர் அலையும் சுற்றுலா நகரத்தில் குறுக்கும் நெடுக்கும் பாய்வோரோ, துளியும் குளிரை அனுபவிக்காமல் எதை எடுத்துப் போக விரும்புகிறீர்கள்!?

பல ”இயற்கை அங்காடி”களுக்கும் இயற்கைக்கும் இருக்கும் தொடர்பு, பஞ்சாபி ஓட்டலுக்கும் பஞ்சாபிக்கும் இருக்கும் தொடர்பைப் போன்றது!

விளையாட்டின் நோக்கமும், வெற்றி / தோல்வி எனும் முடிவுகளின் நோக்கமும் ஒன்றல்ல!

எழுத்தின் மிச்சமாக ஒரு புள்ளி எஞ்சியிருக்கிறது .

ஓடும்வரை ரயில் பெட்டியின் அடியிலிருக்கும் சக்கரங்கள், ரயில் நிலையத்தில் நுழையும்போது பயணிகளின் கால்களுக்கு கீழே இடம் பெயர்ந்துவிடுகின்றன.

வாழ்க்கைக்கு எந்த வகையிலும் பயனில்லாத பல செயல்களை, விரும்பிச் செய்வதை என்றைக்கும் இந்த மனித இனம் கை விடுவதாகத் தெரியவில்லை.

-

விளையாடுவதற்கே விடுமுறை “ஸ்பெஷல் க்ளாஸ்”களுக்கன்று

வாட்ஸப்பில் வலிய ஒரு நண்பர் ஆலோசனை கேட்டார். அறிவுரை(!) சொல்லிக் கொண்டிருக்கிறேன். அது அவருக்குச் சொல்வதல்ல எனக்கு நானே சொல்லிக்கொள்வது!

முன்னதாகவே இரண்டு வாளி தண்ணீர் பிடித்து வைத்துக்கொள்வதன் மூலம், குளியலறைக் குழாயிலிருந்து சூடாக வரும் தண்ணீரை வீணடிக்க வேண்டி வராது

பெரும்பாலான அரசியல் கூட்டங்களுக்கு கூலிக்கு, ஆள் கூட்டிவரும் அளவிற்கு மக்கள் மாறியிருப்பதை நினைக்க ஒரு வகையில் மகிழ்ச்சியாக இருக்கின்றது!

வெயில் சர்வாதிகாரி போல் ஆட்சி செய்கின்றது!

சோம்பேறித்தனமும், வருத்தமும் இல்லாத நாட்களில் மனதில் தத்துவம் எதுவும் தோன்றுவதில்லை!

வாழும் வாழ்க்கை மீது இன்னும் கொஞ்சம் நம்பிக்கை கூட்டத்தான் புத்தாண்டு எனும் நினைவூட்டல்கள்!

மன இடுக்கெங்கும் நிரம்புகிறது வெயில்!

கனவில் வாய்த்த முத்தம்போல் ரகசியமாய்ப் பெய்திருக்கிறது நடு நிசி மழை!

எண்ணங்களை வேடிக்கை பார்க்கும் தருணம் பரவசமானது!

இரயில் பயணங்கள் சுவையற்றதாகவும், இறுக்கமானதாகவும் மாறிப்போனதில் ஸ்மார்ட் போன்களின் பங்கு நிறைய உண்டு.

கசியும் மௌனம்